habaru page ad two

ރާއްޖޭގެ ޒުވާނުންގެ މުސްތަޤްބަލު ބިނާކުރުމަށްޓަކައި، ޤައުމީ ރޫޙާއި އިސްލާމީ އަޚްލާޤު ދިރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި "ދިވެހި ވަޠަނީ ޚިދުމަތް" ޕްރޮގްރާމުގެ ދަށުން ކުރިއަށްގެންދިޔަ "ނޭޝަނަލް ސަރވިސް އިނީޝިއަލް ޓްރޭނިން" ގެ ފުރަތަމަ ބެޗުގެ ކިޔެވުން ނިންމައި 344 ދަރިވަރުން ދަސްވެނިވެއްޖެއެވެ. މި ރަސްމިއްޔާތު ބާއްވާފައިވަނީ ޅ. މާފިލާފުށީގައި ހުންނަ އެމްއެންޑީއެފްގެ ކޮމްޕޮސިޓް ޓްރެއިނިން ސެންޓަރުގައެވެ.

މި ތަމްރީނު ޕްރޮގްރާމަކީ ޤައުމިއްޔަތުގެ ރޫޙާއި ފަޚުރު ދިރުވައި އާލާކޮށް، އިސްލާމްދީނަށް ލޯބިކުރާ، އަދި ޤައުމަށް ޚިދުމަތް ކުރުމުގެ ރޫޙު ހުރި ރައްޔިތެއް ބިނާކުރުމަށް ފެއްޓެވި ޕްރޮގްރާމެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ޕްރޮގްރާމު އިފްތިތާޙުކުރެއްވީ އޮކްޓޯބަރ މަހުގެ 1 ވަނަ ދުވަހުއެވެ. މި ޕްރޮގްރާމުގައި ބައިވެރިވާ ކޮންމެ ޒުވާނަކުވެސް ފުރިހަމަ ކުރަންޖެހޭ ތަމްރީނެއްގެ ގޮތުގައި ކުރިއަށްގެންދާ ނޭޝަނަލް ސަރވިސް އިނީޝިއަލް ޓްރޭނިންގެ ފުރަތަމަ ބުރުގެ ޓްރެއިނިންތައް ފެށީ 350 ދަރިވަރުންނާއެކުގައެވެ.

ޅ. މާފިލާފުށީގައި ބޭއްވުނު މި ރަސްމިއްޔާތު ޝަރަފުވެރިކޮށްދެއްވީ ދިފާޢީ ވަޒީރު މުޙައްމަދު ޣައްސާން މަޢުމޫނެވެ. ދަސްވެނިވި ދަރިވަރުންގެ ޝަރަފުގެ ހިނގާލުންވެސް މި ރަސްމިއްޔާތުގައި ވަނީ ބާއްވާފައެވެ.

ތިން މަސްދުވަހުގެ މުއްދަތަށް ކުރިއަށްގެންދިޔަ މި ތަމްރީނު ޕްރޮގްރާމުގައި ދިވެހި ޤައުމިއްޔަތު، ޒިންމާދާރު ރައްޔިތުކަން، ދީނީ ތަޢުލީމް، ލީޑަރޝިޕް، އަދި ލޭންގުއޭޖް ޕްރޮފިޝެންސީ ފަދަ މުހިންމު ދާއިރާތަކުން ދަރިވަރުންނަށް އުނގަންނައިދީފައިވެއެވެ. މީގެ އިތުރުން ހަށިހެޔޮކަމާއި ދުޅަހެޔޮކަން އަށަގެންނެވުމަށް ކަސްރަތާއި ހަށިހެޔޮކަމުގެ ތަމްރީން ހިމެނޭއިރު، އަޚްލާޤާއި ސުލޫކު ހަރުދަނާކޮށް ކުރިއެރުވުމަށް އަމާޒުކޮށް ހެވިކަމުގެ ތަމްރީނުވެސް ވަނީ ދެވިފައެވެ. ފަސްޓް އެއިޑް، ފަޔަރ ފައިޓިންގ، ސެލްފް ޑިފެންސްގެ އިތުރުން ކޭމްޕް ޙަރަކާތްތަކާއި އަސްކަރީ ޙަރަކާތް ތަޢާރަފް ކޮށްދިނުންވެސް މި ތަމްރީނުގައި ހިމެނުނެވެ.

ދިފާޢީ ވުޒާރާއިން މައުލޫމާތު ދެއްވާގޮތުގައި، ފުރަތަމަ ބުރު ނިންމައި މިހާރު ވަނީ ދެވަނަ ބުރު ފެށުމުގެ މަސައްކަތް ފަށާފައެވެ. ދެވަނަ ބުރުގައިވެސް 350 ބައިވެރިންނަށް ފުރުސަތު ދިނުމަށް ނިންމާފައިވާއިރު، މި ބުރުގެ ޓްރެއިނިންތައް އަންނަ ޖެނުއަރީ މަހު ފެށޭނެއެވެ.

ސަރުކާރުން ރާވާފައިވާގޮތުން، 2026 ވަނަ އަހަރުގެ ޖެނުއަރީ މަހުގެ ތެރޭގައި ދިވެހި ވަޠަނީ ޚިދުމަތުގެ ގުނަވަނެއްގެ ގޮތުގައި ފަންނީ ތަމްރީން އިފްތިތާޙްކުރުމަށްވެސް ވަނީ ހަމަޖެހިފައެވެ. "ނޭޝަނަލް ސަރވިސް އިނީޝިއަލް ޓްރޭނިން" ފުރިހަމަކުރާ ބައިވެރިންގެ ތެރެއިން ޝައުޤާއި، ކޯސްތަކުގެ ޖާގަ ހުރި މިންވަރަށް ބިނާކޮށް، ދިވެހި ވަޠަނީ ޚިދުމަތުގެ ފަންނީ ތަމްރީނުތަކުން އެބައިވެރިންނަށް ފުރުޞަތު ފަހިކޮށް ދިނުމަށް ވަނީ ނިންމާފައެވެ.

ނޭޝަނަލް ސާވިސްގެ ފުރަތަމަ ބެޗް ދަސްވެނިވެއްޖެ: 344 ދަރިވަރުން ފާސްވި

ވ. ދެލްވައްތަ، ހޫދު މުހައްމަދު ޒާހިރުގެ މައްޗަށް ޓެރަރިޒަމްގެ ތިން ދައުވާއެއް ސާބިތުވެ، 23 އަހަރަށް ޖަލަށްލުމަށް ކްރިމިނަލް ކޯޓުން މިއަދު ޙުކުމްކޮށްފިއެވެ.

މި މައްސަލައާ ގުޅިގެން ހޫދު ފުލުހުންގެ ބެލުމުގެ ދަށަށް ގެނެސްފައިވަނީ 2022 ވަނަ އަހަރު، ޔޫރަޕުގެ ދެ ގައުމެއްގެ އިދާރާއަކާއި އެމެރިކާގެ އެފްބީއައިއާ ގުޅިގެން ކުރި ހަރަކާތަކުންނެވެ. ކްރިމިނަލް ކޯޓުން ހޫދުގެ މައްޗަށް ސާބިތުކޮށްފައިވަނީ ޓެރަރިސްޓް ޖަމާއަތެއްގެ މެންބަރަކަށްވުމުގެ ކުށާއި، ޓެރަރިސްޓް ޖަމާއަތަކަށް ތާއީދުކުރުމުގެ ކުށާއި، އަދި ޓެރަރިސްޓް ޖަމާއަތަކަށް ތާއީދުކުރާ މީހެއްކަމަށް ދޭހަވާ ފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށެވެ.

މި ތިން ދައުވާއަށް އިއްވާފައިވާ ޖަލު ހުކުމްތަކަކީ:

މި ހުކުމްތަކާއެކު، ހޫދުގެ މައްޗަށް ޖުމްލަ 23 އަހަރުގެ ޖަލު ޙުކްމްއެއް ވަނީ އިއްވާފައެވެ.

ޕްރޮސިކިއުޓަރ ޖެނެރަލްގެ އޮފީހުން މި މައްސަލަ ކްރިމިނަލް ކޯޓަށް ހުށަހަޅާފައިވަނީ މިއަހަރުގެ އޭޕްރީލް މަހުގެ 18 ވަނަ ދުވަހުއެވެ. ހޫދުގެ މައްޗަށް ދައުވާ އުފުލާފައިވަނީ 2015 ވަނަ އަހަރުން ފެށިގެން 2022 ވަނަ އަހަރުގެ ޖެނުއަރީ މަހުގެ 6 ވަނަ ދުވަހާހަމައަށް، ތަފާތު އެކި ދުވަސްމަތިންނާއި ތަފާތު އެކި ނަންނަމުގައި ސޯޝަލް މީޑިއާ އެޕްލިކޭޝަންތަކުގައި އައިއެސްއަށް ތާއީދުކޮށް އެ ޖަމާއަތުގެ ޕްރޮޕެގެންޑާ ފެތުރުމުގެ އިތުރުން ޓެރަރިޒަމްއާ ގުޅުން ހުރި ވަކި ވަކި ޢަމަލުތަކަށް ރިޢާޔަތްކޮށް ޖުމްލަ 5 ދަޢުވާއެއްގެ ދަށުންނެވެ.

ކްރިމިނަލް ކޯޓުން މި މައްސަލަ ބެލި އިރު، ހޫދުގެ މައްޗަށް 5 ދައުވާއެއް އުފުލާފައިވީ ނަމަވެސް، އޭގެ ތެރެއިން 3 ދައުވާއެއް ސާބިތުވިއިރު، އަނެއް 2 ދައުވާ ސާބިތު ނުވާކަމަށް ވަނީ ކަނޑައަޅާފައެވެ. ސާބިތުނުވި ދެ ދައުވާއަކީ އިންޓަރނެޓް މެދުވެރިކޮށް ޓެރަރިޒަމްގެ ޢަމަލެއް ކުރުމަށް ހިތްވަރު ދިނުމާއި، އިންޓަރނެޓް މެދުވެރިކޮށް ޓެރަރިސްޓް ޖަމާޢަތެއްގެ ލިޔެކިޔުންތައް ފެތުރުމުގެ ދައުވާއެވެ.

ޓެރަރިޒަމްގެ 3 ދައުވާއެއް ސާބިތުވެ، ހޫދު 23 އަހަރަށް ޖަލަށް

2026 ވަނަ އަހަރު ބާއްވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލާ ކެންޑިޑޭޓުންގެ ފޯމު އޮންލައިންކޮށް ހުށަހެޅުމަށް ބަދަލުކުރުމާ ގުޅޭގޮތުން ސިޔާސީ ޕާޓީތަކަށް މައުލޫމާތު ދިނުމަށް އިލެކްޝަންސް ކޮމިޝަން (އީސީ) އިން ބައްދަލުވުމެއް ބާއްވައިފިއެވެ. މި ބައްދަލުވުން ބާއްވާފައިވަނީ މިއަދުއެވެ.

އީސީން ވިދާޅުވީ، މިއަދު ކުރިއަށްގެންދިޔަ މި ބައްދަލުވުމުގައި، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)، ޢަދާލަތު ޕާޓީ (އޭޕީ)، މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ)، ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބައިވެރިވެފައިވާ ކަމަށެވެ.

 މެދުވެރިކޮށް ކެންޑިޑޭޓުން އެޕްލިކޭޝަން ފޯމު ހުށަހަޅާނެ ގޮތާއި، ސިޔާސީ ޕާޓީތައް ތަމްސީލުކުރާ ކެންޑިޑޭޓުން އެންޑޯޒްކުރުމަށް ޕާޓިތަކުން އަމަލުކުރަންވީ ގޮތުގެ މަޢުލޫމާތު ހިއްސާކޮށްފައިވާ ކަމަށް އީސީން ވިދާޅުވިއެވެ. އަދި އިންތިޚާބާށް ކުރިމަތިލުމަށް އެދޭ ފަރާތްތަކުން ދުރާލައި ކުށާއި ދަރަނީގެ ރެކޯޑު ސާފުކޮށްދިނުމަށް އެދި ސިޔާސީ ޕާޓީތަކުން ބާރުއަޅައިދިނުމަށާއި، އިންތިޚާބަށް ކުރިމަތިލުމަށް އެދި އޮންލައިންކޮށް ފޯމު ހުށަހެޅުމާ ގުޅޭގޮތުން ޢާންމުން ޙޭލުންތެރިކުރުވުމަށް ސިޔާސީ ޕާޓީތަކާއި، އެކޮމިޝަން ގުޅިގެން ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރެވުނު ކަމަށްވެސް އީސީން ވަނީ ހާމަކުރައްވާފައެވެ.

އިންތިޚާބަށް ކުރިމަތިލުމަށް އެދި ފޯމު ހުށަހެޅުން އޮންލައިން ނިޒާމަކަށް ބަދަލުކުރުމަކީ، އެކޮމިޝަނުން ފޯރުކޮށްދެމުންދާ ޚިދުމަތްތައް ލުއިފަސޭހަކަމާއެކު ޢާންމުންނަށް ފޯރުކޮށްދިނުމަށްޓަކައި ކޮމިޝަނުގެ ޚިދުމަތްތައް ޑިޖިޓަލައިޒްކުރުމަށް ކުރެވޭ މަސައްކަތުގެ ބައެއް ކަމަށް އީސީން ފާހަގަކުރެއްވިއެވެ.

އީސީން ވިދާޅުވީ، އާންމުންނާއި ސިޔާސީ ޕާޓީތަކަށް މިކަމާގުޅޭ މަޢުލޫމާތު ދިނުމުގެ ގޮތުން، އިތުރު ހަރަކާތްތައް ކުރިއަށްގެންދިއުމަށް ރާވާފައިވާ ކަމަށެވެ.

ލޯކަލް ކައުންސިލް އިންތިޚާބަށް އޮންލައިންކޮށް ފޯމު ހުށަހެޅުމުގެ މައުލޫމާތު ޕާޓީތަކަށް ދީފި

ގެދޮރުވެރިޔާ ސްކީމުގެ ދަށުން އެޅި 4000 ހައުސިންގ ޔުނިޓުގެ ފްލެޓް ލިބޭ ފަރާތްތަކުގެ ތެރެއިން މިހާތަނަށް 399 މީހަކަށް ތަޅުދަނޑި ހަވާލުކޮށްފައިވާ ކަމަށް ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. އެފްޑީސީން މި ފްލެޓްތަކުގެ ތަޅުދަނޑި ހަވާލުކުރުމުގެ މަސައްކަތް ފަށާފައިވަނީ ސެޕްޓެމްބަރު 28 ވަނަ ދުވަހުއެވެ.

ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި ވަޒީރު ޑރ. ޢަބްދުﷲ މުއްޠަލިބު ވިދާޅުވީ، ގެދޮރުވެރިޔާ ސްކީމުގެ ދަށުން ފްލެޓު ލިބޭ 3879 ފަރާތަކާއެކު މިހާތަނަށް އެއްބަސްވުން ގާއިމްކުރެވިފައިވާ ކަމަށާއި، އެއްބަސްވުން ހެދިފައިވާ ހުރިހާ ފަރާތްތަކާވެސް އަންނަ ޖަނަވަރީ މަހުގެ ނިޔަލަށް ތަޅުދަނޑި ހަވާލުކުރެވޭނެ ކަމަށެވެ.

ފްލެޓު ހަވާލުކުރުން ލަސްވެގެންދިޔަ ސަބަބާ ގުޅޭގޮތުން ވަޒީރު ވިދާޅުވީ، އެއްބަސްވުމުގައި ފެނާއި ކަރަންޓުގެ މަސައްކަތްތައް ހިމެނިފައިނުވުން ކަމަށެވެ. ނަމަވެސް މި ސަރުކާރުން މަސައްކަތްތައް އަވަސްކުރުމަށް ގިނަ މަސައްކަތްތަކެއް ކޮށްފައިވާކަން ވަޒީރު ފާހަގަކުރެއްވިއެވެ. "މި ސަރުކާރު ހަވާލުވީއިރު މަސައްކަތް ނިމިފައިވަނީ %33، 2 އަހަރު ތެރޭ %68 މަސައްކަތް ނިންމާ، ފެނާ ކަރަންޓު ގުޅުމުގެ މަސައްކަތް ނިންމާ، ލޭންޑު ސްކޭޕިންގެ މަސައްކަތް ނިންމާ، މިހާރު ފްލެޓުތައް ހަވާލުކުރަމުން އެދަނީ،" ވަޒީރު ޑރ. މުއްޠަލިބް ވިދާޅުވިއެވެ.

ތަޅުދަނޑި ހަވާލުކުރެވެނީ، އެއްބަސްވުމުގައި ސޮއިކޮށް، ޑިޕޮސިޓް ފައިސާ ދެއްކުމުންނެވެ. ސަރުކާރުން ވަނީ ގަވާއިދުން ކުލި ދައްކާ ފަރާތްތަކަށް ބޮޑު ސަބްސިޑީއެއް ދިނުމަށް ނިންމަވާފައެވެ. އަދި ފްލެޓްތައް ހަވާލުކުރެވެނީ ފިނިޝިން ހުރިހާ މަސައްކަތެއްވެސް ނިންމުމަށްފަހުއެވެ.

މި ފްލެޓުތައް ލިބުނު ފަރާތްތަކުން ދައްކަންޖެހޭ ކުއްޔާއި ޑައުންޕޭމަންޓް ކުޑަކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެ އަގުތަކަށް ބަދަލުގެނެސްދެއްވާފައެވެ. އެގޮތުން، މިހާރު 3 ކޮޓަރީގެ އެޕާޓްމަންޓުތަކަށް ޑައުންޕޭމަންޓްގެ ގޮތުގައި 8,500 ރުފިޔާ އަދި ކުލީގެ ގޮތުގައި މަހަކު 10,000 ރުފިޔާ ދައްކަންޖެހޭ ގޮތަށް ވަނީ ބަދަލު ގެނެސްފައެވެ. އަދި ދެ ކޮޓަރީގެ އެޕާޓްމަންޓުތަކުގެ ޑައުންޕޭމަންޓަށް 6,000 ރުފިޔާ އަދި މަހު ކުލީގެ ގޮތުގައި 7,000 ރުފިޔާ ދައްކަންޖެހޭ ގޮތަށް ވަނީ އަގުތައް ކުޑަކޮށްދެއްވާފައެވެ.

މި ގެނައި ބަދަލުތަކާއެކު، ޑައުންޕޭމަންޓުގެ ގޮތުގައި ކުރީގެ އަގުތަކާ އެއްގޮތަށް ފައިސާ ދައްކާފައިވާ ފަރާތްތަކަށް އެ ފްލެޓެއްގެ ޑައުންޕޭމަންޓަށްވާ އަދަދު ކެނޑުމަށްފަހު ބާކީވާ ފައިސާ މަހު ކުލިން އުނިކުރުމަށް ވަނީ ނިންމާފައެވެ. މީގެ އިތުރުން، ތަޅުދަނޑި ހަވާލުކުރާ ތާރީޚުން ފެށިގެން ތިން މަސް ދުވަސް ވަންދެން ފްލެޓްތަކަށް ކުލި ދައްކާކަށް ނުޖެހޭނެއެވެ. ނަމަވެސް އެ މުއްދަތުގައި ފްލެޓުގެ މެއިންޓެނަންސް ފީ ދައްކަން ޖެހޭނެއެވެ.

4000 ހައުސިންގ ޔުނިޓް: 399 މީހަކަށް ތަޅުދަނޑި ހަވާލުކޮށްފި

ވެލާނާ އިންޓަރނޭޝަނަލް އެއަރޕޯޓުގެ އައު ޕެސެންޖަރ ޓަރމިނަލުން ރަޝިއާގެ އެންމެ ބޮޑު އެއަރލައިން ކަމަށްވާ އެއޮރޯފްލޮޓް އެއަރލައިނަށް ޚިދުމަތް ދޭން ފަށައިފިއެވެ. މިކަމުގެ ސަބަބުން، ވެލާނާ އެއަރޕޯޓުގެ ޚިދުމަތުގެ ފެންވަރު އިތުރަށް ރަނގަޅުވެ، ދަތުރުފަތުރުގެ ކަންކަން މަތީ ފެންވަރެއްގައި ކުރިއަށް ގެންދެވޭނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވިދާޅުވެއެވެ.

އެއޮރޯފްލޮޓް އެއަރލައިނަށް ވީއައިއޭ ޓަރމިނަލް 1އިން ޚިދުމަތް ދޭން ފެށުމުގެ ރަސްމިއްޔާތު ބާއްވާފައިވަނީ ޓަރމިނަލް 1 ގައެވެ. މި ހަފްލާ ޝަރަފްވެރިކޮށްދެއްވީ ރައީސް އޮފީހުގެ ޕްރިންސިޕަލް ސެކެޓްރީ ޓު ދަ ޕްރެޒިޑެންޓު އޮން ޕޮލިސީ އެންޑް މެނިފެސްޓޯ ޙުސައިން ފަޙުމީއެވެ.

މި ރަސްމިއްޔާތުގައި އެއޮރޯފްލޮޓުގެ ޖެނެރަލް މެނޭޖަރ އޮފް ދަ މޯލްޑިވްސް އެވެންގީ ރަޓުޝްނީ، ކޮންސަލް އޮފް ދަ ރަޝިއަން ފެޑެރޭޝަން އިން ދަ މޯލްޑިވްސް އަލެސްކި އިޑަމްކިންއާއި، އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުހައްމަދުގެ އިތުރުން އެމްއޭސީއެލްގެ އެކްސްކޯ މެމްބަރުން ބައިވެރިވެ ވަޑައިގެންނެވިއެވެ.

އެއޮރޯފްލޮޓްއާއެކު ޓަރމިނަލް 1 އިން މިހާރު ޖުމްލަ 39 އެއަރލައިނަކަށް ދަނީ ޚިދުމަތް ދެމުންނެވެ. އެމްއޭސީއެލުން ވިދާޅުވީ، ރާއްޖެއަށް ދަތުރު ކުރާ ހުރިހާ އެއަރލައިނަކަށްވެސް އެންމެ ފުރިހަމަ އަދި އެންމެ މަތީ ފަންތީގެ ޚިދުމަތް ފޯރުކޮށްދިނުމަށް ގަދައަޅާ މަސައްކަތް ކުރަމުންދާ ކަމަށެވެ. މީގެ ސަބަބުން، ރާއްޖޭގެ ޓޫރިޒަމް ދާއިރާއަށްވެސް ހެޔޮ ބަދަލުތަކެއް އަންނާނެކަމަށް ލަފާކުރެވެއެވެ.

އައު ޓާމިނަލުން އެއޮރޯފްލޮޓް އެއަރލައިނަށް ޚިދުމަތް ދޭން ފަށައިފި

ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ޚާއްސަ ފިޔަވަޅުތަކެއް ޖެނުއަރީ 1، އިން ފެށިގެން ތަންފީޒު ކުރަން ފަށާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ސޯޝަލްމީޑިއާގައި ހިއްސާކުރެއްވި 

ރައީސް ޑރ. މުޙައްމަދު ވަނީ ދާދިފަހުން ކުދި އަދި މެދު ފަންތީގެ ވިޔަފާރިވެރިންނާއި ބައްދަލުކުރައްވާ އެބޭފުޅުންގެ ކަންބޮޑުވުންތައް އަޑުއައްސަވާ، ރަނގަޅުކުރަން ޖެހޭ ކަންކަމުގެ ޚިޔާލާއި މަޝްވަރާ ހޯއްދަވާފައެވެ.

މިކަމަށް ޢިޝާރާތްކުރައްވާ ރައީސް ވިދާޅުވީ ކުދި އަދި މެދު ފަންތީގެ ވިޔަފާރީގެ ދާއިރާގެ ވިޔަފާރިވެރިންނާއެކު 17 ޑިސެންބަރު 2025 ގައި ބޭއްވުނު ބައްދަލުވުމުގައި ވިޔަފާރިވެރިން ފާހަގަކުރެއްވި ކަންކަމުގެ އަލީގައި، އެ ދާއިރާ ކުރިއެރުވުމަށް މެނިފެސްޓޯގައި ކަނޑައަޅާފައިވާ ކަންކަމާއި ސަރުކާރުން އެ ދާއިރާއާއި ގުޅޭގޮތުން ކުރިޔަށް ގެންދާ އެކިކަންކަމުގެ ނަތީޖާ ހެޔޮގޮތުގައި ބައްޓަންކުރުމަށްޓަކައި، ކެބިނެޓުގައި މިދިޔަ ބުދަ ދުވަހު މަޝްވަރާކުރެވި ގިނަގުނަ ކަންތައްތަކެއް ނިންމާފައިވާ ކަމަށެވެ.

އެގޮތުން، ކުދި އަދި މެދު ފަންތީގެ ވިޔަފާރިވެރިންނާއެކު ބޭއްވި ބައްދަލުވުމުގައި އިޢުލާނު ކުރި ކަންކަމުގެ އިތުރުން، ކުރިޔަށް އޮތް 2 އަހަރު ދުވަހަކީ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ޚާއްސަ ފިޔަވަޅުތަކެއް ތަންފީޒު ކުރާނެ 2 އަހަރު ގޮތުގައި ކަނޑައަޅުއްވާފައިވާކަން ރައީސް ވަނީ ފާހަގަކުރައްވާފައެވެ. މީގެ ތެރެއިން ބައެއް ކަންކަން މިފެށޭ ޖެނުއަރީ 1، 2026 އިން ފެށިގެން ތަންފީޒު ކުރަން ފަށާނެ ކަމުގެ ޔަޤީންކަންވެސް ރައީސް ވަނީ ދެއްވާފައެވެ.

ރައީށް ވިދާޅުވީ ކުރިއަށް އޮތް ދުވަސްތަކުގައި މި ހުރިހާ ކަންކަމެއްގެ މަޢުލޫމާތު ސަރުކާރުގެ ކަމާބެހޭ ފަރާތްތަކުން ޢިއުލާން ކުރަމުން ދާނެކަމަށެވެ.

ރައީސްގެ ޕޯސްޓާއި ގުޅިގެން އިކޮނޮމިކް މިނިސްޓަރ ވިދާޅުވީ ރައީސްގެ މި ނިންމެވުމާއެކު 2026 އަދި 2027 އަކީ ކުދި ވިޔަފާރިތަކަށް މުޅިސަރުކާރުން ޚާއްޞަ ލުއިތަކެއް ލިބޭނެ 2 އަހަރަށް ވާނެކަމަށެވެ. އަދި މިއީ، ކުދި ވިޔަފާރިތަކާއި އަލަށް ވިޔަފާރީގެ ދާއިރާއަށް ވަންނަ ފަރާތްތަކަށްވެސް ބޮޑު ފަސޭހައަކާއި ހިތްހަމަޖެހުމެއް ލިބިގެންދާނެ ކަމެއް ކަމުގައި މިނިސްޓަރ ސަޢީދު ފާހަގަކުރެއްވިއެވެ.

މިގޮތުން ކުދި އަދި މެދުފަންތީގެ ވިޔަފާރިތަކަށް ލުއި ދިނުމާއި ކަންކަން ފަހިކޮށް ދިނުމަށް ގެންނަ ބަދަލުތައް ކުރިއަށްއޮތް ދުވަސްތަކުގައި ހާމަ ކުރަމުން ގެންދާނެ ކަމުގެ ޔަޤީންކަން މިނިސްޓަރ ސަޢީދުވެސް ވަނީ ދެއްވާފައެވެ.

ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ޚާއްސަ ފިޔަވަޅުތަކެއް ޖެނުއަރީ 1، އިން ފެށިގެން ތަންފީޒު ކުރަން ފަށާނެ: ރައީސް

2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ދިވެހިރާއްޖެއަށް ކުރިމަތިވި ބިރުވެރި ސުނާމީ ކާރިސާގެ ހަނދާންތައް އާކުރައްވަމުން، އެ ދުވަހަކީ ދިވެހިންގެ މެދުގައި އޮތް ބަދަހި ގުޅުމާއި އެއްބައިވަންތަކަމުގެ ރޫހު ދައްކައިދިން ދުވަހެއް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ގައުމީ އެއްބައިވަންތަކަމުގެ ދުވަހާ ގުޅިގެން މިއަދު މީސް މީޑިއާގައި ކުރެއްވި ޕޯސްޓެއްގައެވެ.

ގައުމީ އެއްބައިވަންތަކަމުގެ ދުވަހާ ގުޅިގެން މިއަދު މީސް މީޑިއާގައި ކުރެއްވި ޕޯސްޓެއްގައި ރައީސް މައުމޫން ވަނީ އެ ހަނދާންތައް އާކުރައްވައި، ދިވެހި ރައްޔިތުންނަށް ތަހުނިޔާ ފޮނުއްވާފައެވެ. އެމަނިކުފާނު ފާހަގަކުރެއްވީ، 19 އަހަރު ފަހުންވެސް ސުނާމީ ކާރިސާއަކީ ދިވެހިންގެ އެއްބައިވަންތަކަމާއި އެކުވެރިކަން އަބަދުވެސް އާކޮށްދޭ ދުވަހެއްގެ ގޮތުގައެވެ.

ސުނާމީ ކާރިސާ ކުރިމަތިވިއިރު، އޭރު ރާއްޖޭގެ ރައީސްކަމުގައި ހުންނެވީ ރައީސް މައުމޫން އަބްދުލްގައްޔޫމްއެވެ. މި ބިރުވެރި ކާރިސާއަށްފަހު، ރައްޔިތުންނަށް އެހީތެރިވުމުގައި ދިވެހިން ދެއްކި އަޅައިލުމާއި އޯގާތެރިކަމަކީ، ދިވެހި ސަގާފަތުގެ ވަރަށް ރީތި މިސާލެއްކަމަށް ގިނަ ބަޔަކު ދެކެއެވެ. މި ކާރިސާ ހިނގިތާ ކުޑަ ވަގުތުކޮޅެއްގެ ތެރޭގައި ސަރުކާރުގެ އިދާރާތަކާއި، ދިވެހި ސިފައިންނާއި ފުލުހުން ގުޅިވަޑައިގެން، ހާލުގައި ޖެހުނު މީހުންނަށް އެހީ ފޯރުކޮށްދިނުމުގެ މަސައްކަތް ވަގުތުން ފެއްޓެވިއެވެ.

ހާލުގައި ޖެހުނު މީހުންނަށް ތަކެތި ފޯރުކޮށްދިނުމަށް ހުޅުވާލެއްވި ފުރުސަތުގައި ރައްޔިތުންގެ ފަރާތުން ލިބުނު އެހީތެރިކަން ވަރަށް ބޮޑަށް ފެނިގެންދިޔައެވެ. ބޯފެނާއި، ބޭހާއި، ކާބޯތަކެއްޗާއި، އަންނައުނު ފަދަ ޒަރޫރީ ބޭނުންތަކަށް ބޭނުންވާ ތަކެތި ހަމަޖެއްސުމުގެ މަސައްކަތް ވަރަށް ހަލުވިކަމާއެކު ކުރިއަށްގެންދެވުނެވެ.

ދިވެހިން ދައްކުވައިދިން މިފަދަ އެއްބައިވަންތަކަމުގެ ރީތި ނަމޫނާ ފާހަގަކޮށް، އެ ހަނދާން އާކުރުމުގެ ގޮތުން، 2005 ވަނަ އަހަރުން ފެށިގެން ކޮންމެ އަހަރެއްގެވެސް ޑިސެމްބަރު މަހުގެ 26 ވަނަ ދުވަސް ދިވެހިން ފާހަގަކުރަމުން އަންނަނީ "ގައުމީ އެއްބައިވަންތަކަމުގެ ދުވަސް" ގެ ގޮތުގައެވެ.

ސުނާމީގެ ކާރިިސާއިން ފެނިގެންދިޔައީ ބަދަހި ގުޅުމާއި އެއްބައިވަންތަކަމުގެ ރޫހު: މައުމޫން

ދިވެހިރާއްޖޭގެ މަތީ ތަޢުލީމުގެ ފެންވަރު ބައިނަލްއަޤްވާމީ މިންގަނޑުތަކާ އެއްހަމައެއްގައި ހިފެހެއްޓުމަށްޓަކައި، މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ރާއްޖޭގައި ހިންގާ ޑޮކްޓޯރަލް ޑިގްރީ (ޕީއެޗްޑީ) ޕްރޮގްރާމްތަކާ ގުޅޭގޮތުން މުހިންމު ނިންމުމެއް ނިންމައިފިއެވެ. އެ ނިންމުމާއެކު، ރާއްޖޭގައި ހަދާ ޕީއެޗްޑީ ގަބޫލުކުރެވޭނީ މަދުވެގެން ތިން އަހަރު ފުލްޓައިމްކޮށް ކިޔަވައިގެން ނަމައެވެ.

އެމްކިއުއޭއިން ވިދާޅުވީ، ދިވެހިރާއްޖޭގެ މަތީ ތަޢުލީމުދޭ މަރުކަޒުތަކުން ހިންގާ ޑޮކްޓޯރަލް ޑިގްރީ ޕްރޮގްރާމްތަކުގެ މުއްދަތާއި ޕްރޮގްރާމް ޑެލިވާކުރާ ގޮތާއި ގުޅޭގޮތުން ޢަމަލުކުރާނެ ވަކި ޚާއްޞަ އުސޫލެއް މިވަގުތު ލިޔެވިފައި ނެތްކަމުގައި ވީނަމަވެސް، ރާއްޖޭން ބޭރުގެ މަތީ ތަޢުލީމުދޭ މަރުކަޒުތަކުގެ ޑޮކްޓޯރަލް ޑިގްރީ ޤަބޫލުކުރާނޭ ގޮތުގެ އުސޫލުގައި ޑޮކްޓޯރަލް ޑިގްރީ ޤަބޫލުކުރުމާއިގުޅޭ މިންގަނޑެއް ބަޔާންކޮށްފައިވާ ކަމަށެވެ.

އެހެންކަމުން، އެ އުސޫލުގައި ބަޔާންކުރާ މިންގަނޑު، ރާއްޖޭގައި ނުވަތަ ރާއްޖެއާއި ރާއްޖޭން ބޭރުގެ މަރުކަޒަކާ ގުޅިގެން ހިންގޭ ޑޮކްޓޯރަލް ޑިގްރީ ޕްރޮގްރާމްތަކަށް ތަތުބީގުކުރުމަށް، އެ އޮތޯރިޓީގެ އެޑްވައިޒަރީ ބޯޑުގެ ލަފާގެ މަތިން ނިންމާފައިވާ ކަމަށް އެމްކިއުއޭއިން ހާމަކުރެއެވެ.

އެގޮތުން، ފުލް ޓައިމް މުއްދަތުކަމަށް ބަލާނީ، އެމް.އެން.ކިއު.އެފް (މޯލްޑިވްސް ނޭޝަނަލް ކޮލިފިކޭޝަންސް ފްރޭމްވޯކް) ގައިވާ ގޮތަށް މަދުވެގެން 3 (ތިނެއް) އަހަރު ދުވަހުގެ މުއްދަތެވެ. ޕާރޓް ޓައިމް މުއްދަތުކަމަށް ބަލާނީ، މަދުވެގެން ފުލް ޓައިމް މުއްދަތު ދެ ގުނަ މުއްދަތެވެ. ނުވަތަ އެޕްރޮގްރާމް ހިންގާ މަރުކަޒުން ކަނޑައަޅާ ޕާރޓް ޓައިމް މުއްދަތަކަށް ވާންވާނީ، ފުލް ޓައިމް މުއްދަތުގެ ދެ ގުނަ މުއްދަތަށްވުރެ މަދުނޫން މުއްދަތެކެވެ.

އެމްކިއުއޭއިން އިތުރަށް ވިދާޅުވެފައިވަނީ، ޑޮކްޓޯރަލް ޑިގްރީ ޕްރޮގްރާމަކީ 360 ކްރެޑިޓް ހަމަވާންޖެހޭ އަދި ގިނަ ޢަދަދެއްގެ ދިރާސާތައް އެކުލެވޭ ޕްރޮގްރާމެއް ކަމަށެވެ. މި ޕްރޮގްރާމުގައި އެންމެ މަދުވެގެން ފުލްޓައިމްކޮށް 3 (ތިނެއް) އަހަރު ދުވަހުގެ ތެރޭގައި 3,600 ގަޑިއިރު ފުރިހަމަކުރަންޖެހޭއިރު، ވަޒީފާ އަދާކުރަމުން ފުލްޓައިމްކޮށް މި ޕްރޮގްރާމުގައި ކިޔެވުމަކީ އެކަށީގެންވާ ކަމެއް ނޫން ކަމަށެވެ.

އެހެންކަމުން، ވަޒީފާ އަދާކުރާ ފަރާތްތަކުން މި ޕްރޮގްރާމުގައި ބައިވެރިވާނަމަ، ޕާރޓްޓައިމް އުސޫލުން ކިޔެވުމަށް އެމްކިއުއޭއިން ވަނީ އަންގާފައެވެ. ނަމަވެސް، ވަޒީފާއެއް އަދާނުކޮށް ހަމައެކަނި ކިޔެވުމަށް ޚާއްޞަވެގެން ތިބޭ ފަރާތްތަކަށް ފުލްޓައިމްކޮށް ކިޔެވިދާނެ ކަމަށް ޤަބޫލުކުރެވޭ ކަމަށް އެ އޮތޯރިޓީން ވިދާޅުވިއެވެ.

މި ނިންމުމުގެ ސަބަބުން ރާއްޖޭގެ މަތީ ތަޢުލީމާއި ތަމްރީނުދޭ މަރުކަޒުތަކުން ހިންގާ ޑޮކްޓޯރަލް ޑިގްރީ ޕްރޮގްރާމްތަކުގެ ފެންވަރު ބައިނަލްއަޤްވާމީ މިންގަނޑުތަކާ އެއްހަމައެއްގައި ހިފެހެއްޓުމަށް އެހީތެރިވެގެންދާނެ ކަމަށް އެމްކިއުއޭއިން ބުނެއެވެ. މިކަމާ ގުޅޭގޮތުން ޢަމަލުކުރުމަށް މަތީ ތަޢުލީމާއި ތަމްރީނުދޭ ހުރިހާ މަރުކަޒުތަކަށް ވަނީ އަންގާފައެވެ.

ތިން އަހަރު ފުލްޓައިމްކޮށް ކިޔެވުމުން ނޫނީ ރާއްޖޭގައި ހަދާ ޕީއެޗްޑީ ގަބޫލު ނުކުރާނެ

އެންވަޔަރަމަންޓަލް ރެގިއުލޭޓްރީ އޮތޯރިޓީ (އީ.އާރު.އޭ) ގެ ހުއްދަ ނުހޯދާ، ރ. އިފުރުގައި ސީޕްލޭން ޕްލެޓްފޯމެއް ތަރައްޤީ ކުރުމުގެ މަސައްކަތްކުރި މަންތާ އެވިއޭޝަން ޕްރައިވެޓް ލިމިޓެޑް، 20000 (ވިހި ހާސް) ރުފިޔާއިން ޖޫރިމަނާކޮށްފިއެވެ. މި ޖޫރިމަނާކުރެވުނީ ތިމާވެށި ރައްކާތެރިކުރުމުގެ ޤަވާއިދުތަކާ ޚިލާފަށް ޢަމަލީ މަސައްކަތް ފެށުމުން ކަމަށް އެ އޮތޯރިޓީން ހާމަކުރެއެވެ.

އީ.އާރު.އޭ އިން މަންތާ ކުންފުނި ޖޫރިމަނާކޮށްފައިވަނީ، ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު (އީ.އައި.އޭ) ހެދުމާބެހޭ ޤަވާއިދުގައި ބަޔާންކޮށްފައިވާ ގޮތުން، ތިމާވެއްޓަށް ފާހަގަކުރެވޭ ބަދަލެއް ނުވަތަ ނޭދެވޭ އަސަރެއް ކޮށްފާނެ މަޝްރޫޢުތަކުގެ ޢަމަލީ މަސައްކަތް ފެށުމުގެ ކުރިން، ޤަވާއިދުގައި ބަޔާންކުރާ ގޮތަށް ސްކްރީންކޮށް، ތިމާވެއްޓަށް އަސަރުކުރޭތޯ ބަލާ ރިޕޯޓު ހުށައަޅާ އެންވަޔަރަމަންޓަލް ރެގިއުލޭޓްރީ އޮތޯރިޓީގެ ހުއްދަ ހޯދަންޖެހޭނެތީއެވެ.

އެހެންނަމަވެސް ރ. އިފުރުގައި ސީޕްލޭން ޕްލެޓްފޯމެއް ހެދުމަށްޓަކައި މަންތާ އެވިއޭޝަން ޕްރައިވެޓް ލިމިޓެޑުން އެ އޮތޯރިޓީގެ ހުއްދަ ހޯދުމަކާ ނުލާ، މަޝްރޫޢުގެ ޢަމަލީ މަސައްކަތްކޮށްފައިވެއެވެ. މިކަމަކީ އެފަދަ ކަމެއް ކުރި ފުރަތަމަ ފަހަރު ކަމަށް ވާތީ ވިހި ހާސް ރުފިޔާއިން އެކުންފުނި ވަނީ ޖޫރިމަނާކޮށްފައެވެ.

އެންވަޔަރަމަންޓަލް ރެގިއުލޭޓްރީ އޮތޯރިޓީން ވަނީ، ސަރުކާރު ބަންދު ދުވަސްތައް ހިމަނައިގެން މަސްދުވަހުގެ ތެރޭގައި ޖޫރިމަނާ ދައްކާ ޚަލާސް ކުރުމަށް މަންތާ އެވިއޭޝަނަށް އަންގާފައެވެ. އަދި އެ މަސައްކަތް ކުރިއަށް ގެންދާނަމަ އެކަން ޤަވާއިދާ އެއްގޮތަށް ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހުށައަޅާ، ކަނޑައެޅިފައިވާ މަރުޙަލާތަކުގެ ތެރެއިން ކުރިއަށް ގެންދިޔުމަށްވެސް އެ އޮތޯރިޓީން ވަނީ ނަސޭޙަތްތެރިވެފައެވެ.

މަންތާ އެވިއޭޝަނުން ދަނީ، ރާއްޖޭގެ އެތެރޭގެ އުދުހުންތަކުގައި ފުޅާދާއިރާއެއްގައި ހަރަކާތްތެރިވަމުންނެވެ. އަދި އެކުންފުނީގެ ފްލީޓު ބޮޑުކޮށް އޮޕަރޭޝަން ފުޅާކުރުމަށްވެސް ދަނީ މަސައްކަތް ކުރަމުންނެވެ.

ހުއްދަ ނެތި ރ.އިފުރުގައި ސީޕްލޭން ޕްލެޓްފޯމެއް އެޅުމުން މަންތާ އެވިއޭޝަން 20،000 ރުފިޔާއިން ޖޫރިމަނާކޮށްފި

މިއަދު ވ. އަތޮޅު ކުޑަ އަންބަރާ ކައިރީގައި އޮތް "ޔަސާވާ ޕްރިންސަސް" ނަމަކަށް ކިޔާ ސަފާރީއެއްގައި އަލިފާން ރޯވެ، އެ ސަރަހައްދަށް މޯލްޑިވްސް ނޭޝަނަލް ޑީފެންސް ފޯސް (އެމްއެންޑީއެފް) ފަޔަރ އެންޑް ރެސްކިޔު ސަރވިސްގެ ޓީމުތައް ވަނީ ހަރަކާތްތެރިވާން ފަށާފައެވެ.

އެމްއެންޑީއެފުން ވިދާޅުވީ، "ޔަސާވާ ޕްރިންސަސް" ސަފާރީގައި އަލިފާން ރޯވެގެން ރިޕޯޓުކޮށްފައިވަނީ ވ. އަތޮޅު ކުޑަ އަންބަރާ ކައިރީގައި އޮއްވާ ކަމަށެވެ. މި ހާދިސާގެ ރިޕޯޓު އެމްއެންޑީއެފަށް ލިބުމާއެކު، އަލިފާންގަނޑު ނިއްވާލުމަށްޓަކައި އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ވަނީ ވަގުތުން ހަރަކާތްތެރިވާން ފަށާފައެވެ.

މިހާރުވެސް އެ ސަފާރީގައި ރޯވެފައިވާ އަލިފާން ނިއްވާލުމުގެ މަސައްކަތް ދަނީ ކުރަމުން ކަމަށް އެމްއެންޑީއެފުން ވިދާޅުވެއެވެ. އަލިފާން ރޯވުމުގެ ސަބަބާއި، މިހާދިސާގައި ސަފާރީއަށް ލިބުނު ގެއްލުމުގެ ތަފްސީލު އަދި ސާފުވާގޮތެއް ނުވެއެވެ.

ވ. އަތޮޅު ކުޑަ އަންބަރާ ކައިރީގައި ސަފާރީއެއްގައި އަލިފާން ރޯވެ، އެމްއެންޑީއެފް ހަރަކާތްތެރިވަނީ

އެމްޑީޕީގެ ރައީސް އަދި ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ގާނޫނު އަސާސީއަށް ކުއްލި ގޮތަކަށް ނޭދެވޭ ބޮޑެތި ބަދަލުތަކެއް ގެންނަމުންދާ ކަމަށާއި، އެކަން ހުއްޓުވުމަށާއި އަނބުރާ އިއާދަކުރުމަށް އެމްޑީޕީއިން ކުރަންޖެހޭ މަސައްކަތް ވަރަށް ބޮޑު ކަމަށެވެ. އެމަނިކުފާނު މިހެން ވިދާޅުވީ ބުދަ ދުވަހު އެމްޑީޕީ މައި އޮފީހުގައި، ކުރީގެ ރައީސް މުހައްމަދު ނަޝީދާއެކު ބޭއްވި ނޫސްވެރިންގެ ބައްދަލުވުމެއްގައެވެ.

ރައީސް ސޯލިހް ފާހަގަކުރެއްވި ގޮތުގައި، ގާނޫނު އަސާސީއަށް ގެންނަ މި ބަދަލުތަކުގެ ތެރޭގައި އަސާސީ ހައްގުތަކާ ބެހޭ ގިނަ މާއްދާތަކަށް ބަދަލު ގެނައުން ހިމެނެއެވެ. "އަސާސީ ހައްގުތަކާ ބެހޭ ކިތަންމެ މާއްދާ އެއް ބަދަލު ކޮށްފި،" ސޯލިހް ވިދާޅުވިއެވެ. މީގެ އިތުރުން މިނިވަން މުއައްސަސާތައް ގަނޑުކޮށް އަތްދަށަށް ގެނައުމުގެ ގިނަ މަސައްކަތްތަކެއް ރައީސް މުއިއްޒު ކުރައްވާފައިވާ ކަމަށް ވެސް އެމަނިކުފާނު ވަނީ ފާހަގަކުރައްވާފައެވެ.

ގާނޫނު އަސާސީއަށް ގެންނަ މި ބަދަލުތަކާ މެދު އާންމުންގެ ކަންބޮޑުވުން ފާޅުކުރައްވަމުން ރައީސް ސޯލިހް ވިދާޅުވީ، މި ސަރުކާރު ގެނައުމަށް އިސްކޮށް މަސައްކަތް ކުރި އާންމު ރައްޔިތަކު ވެސް "ސަރުކާރުން ކުރާ ހަމަ އެކަނި ކަމަކީ ގާނޫނު އަސާސީއަށް ބަދަލު ގެނައުން،" ކަމަށް ބުނި ކަމަށެވެ. ގާނޫނު އަސާސީއަކީ އެތައް ބަޔަކު އެތައް ދުވަހަކު މަޝްވަރާ ކޮށްގެން އެކުލަވާލާފައިވާ އެއްޗެއް ކަމަށާއި، އެންމެ މީހަކު ބޭނުންވީމަ ކުއްލިއަކަށް ބަދަލު ކުރާތަން ފެންނަމުންދާތީ އާންމުން ވެސް ކަންބޮޑުވާ ކަމަށް ސޯލިހް ވިދާޅުވިއެވެ.

ރައީސް ސޯލިހް ވަނީ ގާނޫނު އަސާސީ އަށް ގެންނަ މި ބަދަލުތައް ހުއްޓުވުމަށާއި އަދި އަނބުރާ އިއާދަ ކުރުމަށް އެމްޑީޕީ އިން ކުރަންޖެހޭ މަސައްކަތް ވަރަށް ބޮޑުކަން ތަކުރާރުކޮށް ފާހަގަކުރައްވާފައެވެ. އަދި މި ސަރުކާރަށް ދޭންޖެހޭ ވަގުތު ދެވިއްޖެ ކަމަށާއި ދެން އޮތީ އެ މަސައްކަތް ފަށައިގަތުން ކަމަށް ވެސް ރައީސް ސޯލިހް ވިދާޅުވިއެވެ. "އިރާދަ ކުރެއްވިއްޔާ އެ މަސައްކަތްތައް ސަރުކާރަށް ދޭންވާ ވަގުތު ދީފައި އަޅުގަނޑުމެން މި ފަށައިގަންނަނީ،" ސޯލިހް ވިދާޅުވިއެވެ. އެކަން އެގޮތައް އެމްޑީޕީއަށް ކުރެވޭނެ ކަމަށް އެމަނިކުފާނު ދެކެވަޑައިގަންނަވާ ކަމަށް ވެސް ސޯލިހް ވިދާޅުވިއެވެ.

ގާނޫނު އަސާސީ އަށް ރައީސް މުއިއްޒު ގެންނަ މި ބަދަލުތައް ހުއްޓުވުމަށާއި އަދި އަނބުރާ އިއާދަ ކުރުމަށް އެމްޑީޕީ އިން ކުރަންޖެހޭ މަސައްކަތް ވަރަށް ބޮޑު - ރައީސް ސޯލިހް

އަންނަ އަހަރު ބާއްވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިޔުޑީސީ) އިންތިޚާބުގައި ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ޓިކެޓުގައި ވާދަކުރާ ކެންޑިޑޭޓުން ހޮވުމަށް ބާއްވާ ޕްރައިމަރީގައި ޖުމްލަ 152 ކެންޑިޑޭޓުން ވާދަކުރާނެ ކަމަށް އެ ޕާޓީން މިއަދު އިއުލާންކޮށްފިއެވެ.

އެމްޑީޕީގެ ޕްރައިމަރީ ބޭއްވުމަށް ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ 16ވަނަ ދުވަހުއެވެ. މި ޕްރައިމަރީ ބާއްވާނީ، ވާދަކުރަން ހުޅުވާލި ފުރުސަތުގައި އިންތިޚާބުކުރަންޖެހޭ އަދަދަށްވުރެ އިތުރަށް ކުރިމަތިލާފައިވާ ދާއިރާތަކުގައެވެ. އެ ޕާޓީން ވަނީ މި ދާއިރާތަކަށް ކުރިމަތިލާފައިވާ ކެންޑިޑޭޓުންގެ ތަފްސީލްވެސް އާންމުކޮށްފައެވެ.

އެމްޑީޕީން ނެރެފައިވާ ލިސްޓަށް ބަލާއިރު، އަންނަ އަހަރު ބާއްވާ މި ޕްރައިމަރީގައި ވާދަކުރާ 152 ކެންޑިޑޭޓުންގެ ތެރޭގައި ކައުންސިލްތަކުގެ މެންބަރުންނާއި، ރަށު ކައުންސިލް ރައީސުންނާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ރައީސުންނާއި މެންބަރުން ހިމެނެއެވެ.

ސިޓީތަކުގެ މޭޔަރުންނަށް ޓިކެޓް ދިނުމަށް އެމްޑީޕީން ޕްރައިމަރީ ބާއްވާނީ ދެ ސިޓީއެއްގައެވެ. އެއީ މާލެ ސިޓީ އާއި ތިނަދޫ ސިޓީގައެވެ. މި ދެ ސިޓީގެ މޭޔަރުކަމަށް ކުރިމަތިލާފައިވަނީ ކޮންމެ ސިޓީއަކަށްވެސް ދެ ކެންޑިޑޭޓުންނެވެ.

ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބު އަންނަ އަހަރުގެ އެޕްރީލް މަހުގެ 4ވާ ހޮނިހިރު ދުވަހު ބޭއްވުމަށް އިލެކްޝަންސް ކޮމިޝަނުން (އީސީ) ވަނީ ނިންމަވާފައެވެ. މި އިންތިޚާބުގައި ޖުމްލަ 226 ދާއިރާއަކުން، ލޯކަލް ކައުންސިލްތަކުގެ މެންބަރުންނާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެންބަރުން އިންތިޚާބު ކުރުމަށް ވަނީ ހަމަޖެހިފައެވެ.

އެމްޑީޕީ ޕްރައިމަރީގައި 152 ކެންޑިޑޭޓުން ވާދަކުރަނީ

ޓެކްސީ ޑްރައިވަރުންގެ ކަންބޮޑުވުންތައް ހައްލުކޮށްދިނުމަށް ސަރުކާރުން މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ، ޓެކްސީގެ ހިދުމަތް ފޯރުކޮށްދޭ ފަރާތްތަކަށް ކުރިމަތިވާ ދަތިތަކަށް ހައްލެއް ހޯދައި، މި ހިދުމަތް އިތުރަށް ހަރުދަނާކުރުމަށްޓަކައި މިއަދު ރައީސް އޮފީހުގައި ބޭއްވި ޓެކްސީ ޑްރައިވަރސް އެސޯސިއޭޝަނާއިއެކު ބޭއްވި ބައްދަލުވުމުގައެވެ.

ރައީސް އޮފީހުން ވާހަކަ ދައްކަވަމުން ވިދާޅުވީ، މި ބައްދަލުވުމުގައި ޓެކްސީގެ ހިދުމަތް ދިނުމުގައި ކުރިމަތިވާ ދަތިތައް ހައްލު ކުރެވޭނެ ގޮތްތަކާއި، އެ ހިދުމަތް ހަރުދަނާކުރުމަށް ކުރެވިދާނެ ކަންކަމާމެދު މަޝްވަރާކޮށްފައިވާ ކަމަށެވެ.

އެ ބައްދަލުވުމުގައި ޓެކްސީ ޑްރައިވަރސް އެސޯސިއޭޝަނުން ވަނީ ޓެކްސީ ކުރުމަށް ގެނެވޭ ވެހިކަލް ރަޖިސްޓްރީކުރުމާއި ޕާކު ކުރުމުގެ އިންތިޒާމުތައް ކުރީއްސުރެ ހިނގަމުން އައި ގޮތަށްވުރެ ރަނގަޅުކުރުމަށް ކުރެވިދާނެ ކަންކަމާއި، މާލޭގެ ޓްރެފިކް މައްސަލަތައް މަދުކުރުމަށް މިހާރުން މިހާރަށް ގެންނަން ފެންނަ ބަދަލުތަކާ ގުޅޭގޮތުން ހިޔާލުފާޅުކޮށް، މަޝްވަރާކޮށްފައިވާ ކަމަށް ވެސް ރައީސް އޮފީހުން ހާމަކުރެއްވިއެވެ.

މީގެ އިތުރުން، ސަރުކާރުން ފަށާ ޓެކްސީ ލައިނާ ގުޅޭގޮތުން ޓެކްސީ ޑްރައިވާސް އެސޯސިއޭޝަނުގެ ހިޔާލުތައް ރައީސްއަށް ހިއްސާކުރައްވާފައިވެއެވެ. އަދި ޓެކްސީ ޑްރައިވަރުންގެ ދަފްތަރާ ގުޅޭގޮތުން ވެސް ވަނީ ފައިދާކުރަނިވި މަޝްވަރާތަކެއް ކުރައްވާފައި ކަމަށް ރައީސް އޮފީހުން ވިދާޅުވިއެވެ.

ރައީސް އޮފީހުން ވިދާޅުވި ގޮތުގައި، ރައީސް ވަނީ ޓެކްސީ ޑްރައިވަރުންގެ ކަންކަން ރަނގަޅުކުރެއްވުމަށްޓަކައި ޓެކްސީ ޑްރައިވަރުންގެ ދަފްތަރުގެ މުހިންމުކަން ފާހަގަކުރައްވާފައެވެ. އަދި ޓެކްސީ ޑްރައިވަރުންނަށް ފަހިކޮށްދެއްވުމަށް ސަރުކާރުން ވިސްނަވާ މުހިންމު ބައެއް ކަންކަމުގެ މައްޗަށް އެ މަނިކުފާނު އަލިއަޅުވައިލެއްވިއެވެ.

ބައްދަލުވުން ނިންމަވާލައްވަމުން، ޓެކްސީ ޑްރައިވަރުންނާއި، ޓެކްސީ ހިދުމަތް ފޯރުކޮށްދޭ އެހެނިހެން ފަރާތްތައް ޝާމިލްވާގޮތަށް، ޓެކްސީ ޑްރައިވާސް އެސޯސިއޭޝަނުން ފާހަގަކުރެއްވި ކަންތައްތައް ހައްލު ކޮށްދެއްވަން މަސައްކަތްކުރައްވާނެކަމުގެ ޔަގީންކަން ރައީސް ވަނީ ދެއްވާފައެވެ.

ޙަބަރު